全長約5464公里、流域面積約752443平方公里,號稱係中國第二長河嘅黃河,喺唔少嘅詩詞歌賦當中都係浩浩蕩蕩。咁到底條孕育中華民族嘅母親河源頭係點樣呢?今次阿史就帶大家睇一睇啦!

其實關於黃河嘅源頭,歷朝歷代都有人嘗試去搵,對於呢一點亦都有唔同嘅睇法!由於一條大河都係由千千萬萬條小河匯集而成,所以邊條先係源頭就真係各有各睇法,就好似喺唐朝,當時就認為「星宿川」就係黃河源頭,但到底係咪真呢?

喺1952年,我國嘅專家就派出黃河河源查勘隊,以歷時四個月嘅時間進行查勘測量,當時就認為歷史上所指嘅瑪曲先至係黃河正源。之不過呢個講法喺1978年就被黃河源考察組再度實地考察而提出質疑,當時考察組就認為同樣源遠流長、水色相同而且水量較大嘅卡日曲先至係正源。唔少專家喺其後嘅幾十年間都以歷史傳統同埋現場考察等因素提出質疑,黃河源頭一定都未有定論。

直到2008年三江源頭科學考察隊考察後,最終決定以國際上河流正源嘅三個標準「河源唯長、流量唯大、與主流方向一致」,將黃河源頭定位於卡日曲。而呢個黃河源頭泉眼其實就只係得碗口咁大而且流出嘅水並唔係黃色,而係清澈無比,真係估佢唔到!

原圖嚟自網絡